ROXAS CITY – Ginpadangat sa Roxas Memorial Provincial Hospital (RMPH) ang isa ka tricycle driver matapos nga ginaalegar ginbuno sang hubog, sa Magallanes St., Barangay III, Roxas City, kaaina sang kaaganhon.
Ginkilala ang biktima kay Ricky Lorico, 42 anyos kag residente sang Brgy. Libas, Roxas City.
Samtang ang suspek ang ginkilala kay Tommy Gerano, 25 anyos nga residente sang Brgy. Balucuan, banwa sang Dao.
Sandig sa inisyal nga imbestigasyon sang katapo sang Roxas City PNP, ala-1:30 kaina sang kaaganhon samtang nagahulat ang biktima sang iya pasahero sa amu nga lugar, sang hinali nalang nga ginpalapitan ini sang suspek kag ginbuno sang makaduha ka beses nga naigo sa nawala nga hita.
Gin-aresto ang suspek kag sa karon yara ini sa paghinakop sang Roxas City PNP.
Natigayon man nga makaguwa ang biktima sa ospital matapos ang pagbulong sang iya pilas nga naangkon.
Ginahibalo pa kun ano ang motibo sa insidente.
