IVISAN CAPIZ – Patay ang lalaki, matapos aksidente nga nalukpan sang iya sini kaugalingon nga armas-luthang sa Barangay Santa Cruz, Ivisan Capiz.
Sa interview sang Bombo Radyo sa hepe sang Ivisan Municipal Police Station nga si PMaj. Ruby Magallanes, ginapahayag sini nga ginkilala ang biktima kay alyas “Joe”, 30-anyos kag tumandok sang Barangay Maalan, Maayon Capiz.
Suno kay Magallanes, nga sang natabo ang insidente samtang ginasubay sang biktima ang dalan nagikan sa banwa sang Sapian kaupod ang backrider sini kag papauli na kun tani sang natumba ang ginamaneho sini nga motorsiklo kag aksidente nga naglupok ang homemade 12 gauge shotgun nga armas-luthang nga yara sa iya sling bag.
Bangud sa natabo, nag-angkon sang patal nga pilas sa wala nga dughan ang biktima nga gintunaan sang iya kamatayon.
Mahibaluan nga wala sang Closed-circuit television (CCTV), ang lugar sang natabo ang insidente.
