ROXAS CITY – Kumbinsido ang pamilya sang napatay nga police officer nga ‘accidental firing’ ang natabo sa ila nga himata kag wala sini ginhungod nga luthangon ang kaugalingon sa President Roxas Municipal Police Station sa banwa sang President Roxas, Capiz.
Ini ang ginpahayag ni Evelyn Brillo, utod sang napatay nga si Police Executive Master Sergeant Edgar Durias sang Barangay Salocon, banwa sang Panit-an.
Aminado si Brillo nga may problema si Durias bangud natuntuhan ini sa ila ginaproseso nga lisensiya sang mga armas apang para sa iya indi ini sang mabug-at nga rason agud utason sang utod ang iya kaugalingon nga kabuhi.
Mahibaluan nga nakabati na lamang sang duha ka magkasunod nga lupok sang armas ang mga kaupdanan sang biktima kag ginkakibot sang mga ini sang nakit-an nga duguon na si Durias kag may igu sang armas sa iya nga ulo.
Pulis patay matapos aksidente nga natiruhan ang kaugalingon sa police station
Nagaguha sa resulta sang autopsy examination nga ‘through and through’ ang igu sa ulo sang biktima kun sa diin naigu ini sa natuo nga porsyon nga naglapos sa nawala nga porsyon sang iya ulo.
Nahibaluan nga si Durias ang kapin sa 22 ka tuig na nga nagapanerbisyo bilang isa ka pulis kag manug napulo pa lamang ini ka bulan nga assign sa banwa sang President Roxas.
May duha ini ka mga kabataan kun sa diin ang isa diri ang isa man ka police officer.
Sa karon padayon pa nga ginapadalman sang mga otoridad ang ila nga imbestigasyon angut sa kamatayon ni Durias.
