ROXAS CITY – Ginpakigabahin sang utod sang lalaki nga naluthangan sang ginapahayag riding in tandem sa banwa sang Dumalag nga wala sang malain nga record sa ila barangay ang manghod sini.
Matandaan nga nag-angkon sang pilas sa iya tuo nga paa si alyas Jonel, 48-anyos kag residente sang nasambit nga lugar tuga sang pagpangluthang sa Barangay Sta. Cruz, Dumalag, Capiz.
Sa interview sang Bombo Radyo kay Jenny Mecua, ginpahayag sini nga sang natabo ang insidente nagikan sa tindahan ang iya manghod kag magapauli na kun tani sang may nabatian ini nga apat ka lupok sang armas-luthang.
Suno kay Mecua, matapos matiruhan ang iya manghod nakapauli pa ini kag nakapangayo sang bulig nga gilayon naman ginrespondihan kag ginpadangat sa Dao District Hospital para sa nagakaigo nga pagbulong.
Samtang, madasig naman nagpalagyo ang mga suspek padulong sa wala matumod nga direksyon.
Ginapahayag nga nagasuksok sang bonet, naka-jacket nga duag itom kag maong nga pantalon ang mga suspek nga nagasakay sa nagaduag asul kag itom nga motorsiklo.
Sa karon, nagapadayon pa ang imbestigasyon sang Dumalag PNP angut sa nasambit nga insidente.
