Nag-file man sang separado nga Petition for Certiorari and Prohibition sa Supreme Court si VP Sara Duterte kaangut sang impeachment case nga ginpasaka sa iya sang Kamara.
Ginsumiter ini sang kampo sang bise presidente pinaagi sa Fortun Narvasa and Salazar law offices.
Nahibaluan nga nabaton na ini sang korte apang wala na nahingabot sa ila nga en banc session kahapon.
Nahibaluan nga magluwas pa ini sa petisyon sang apat ka Mindanawon lawyers agud balabagan ang impeachment proceedings batuk sa bise presidente.
Ginhinyo man sang mga abogado nga sanday Atty. Israelito Torreon, Atty. Martin Delgra, Atty. James Reserva, Atty. Hillary Olga Reserva, kag Atty. Luna Acosta—nga magpaguwa ang Korte Suprema sang Temporary Restraining Order (TRO) kag Injunction agud kanselahon ang impeachment complaint.
Kaupod man sa mga nagpetisyon ang Bise Alkalde sang Davao City, pila ka miyembro sang konseho sang syudad, kag mga kilala nga political vloggers nga sanday Darwin Salcedo, Lord Byron Cristobal, kag Lord Oliver Raymund Cristobal.
Suno sa ila, depektibo kag indi dapat pamatian sang Senado ang impeachment complaint nga gin-file sang Kamara.
Kwestiyonable suno diri ang verification process sang impeachment complaint.
Pahayag sang mga petitioner, wala gintun-an sang maayo sang mga nagpirma sa reklamo ang kaundan sini, kag hinali lamang ginlakip sa isyu sang impeachment.
Apang depensa sang Kamara, moot and academic na ini bangud yara na sa Senado ang reklamo kag indi na ang korte ang may hurisdiksyon diri.
