ROXAS CITY – Ginareklamo sang mga residente kag mga motorista ang tubtob sa karon wala pa matapos nga pag-repair sang Camanciles Bridge nga nagaangut sa Barangay Bonga kag Barangay Pawa, Panay, Capiz.
Mahibaluan nga ang pagkaayo sa nasambit nga tulay ang proyekto sang Provincial Engineer’s Office kag ang napilian nga kontraktor amo ang Woodland Construction and Supply, Inc. nga may pondo nga kapin 4.1 milyones pesos.
Sang ginpadulungan sang Bombo Radyo News Team ang amo nga lugar, nagawangal ang mga motorista bangud sa houl nga tuga sang wala matapos nga proyekto kun sa diin ila pa nga ginasakwat ang ila tagsa ka mga motorsiklo para lamang makatabok sa wala matapos nga tulay.
Mahibaluan nga sandig sa program of works sang amo nga proyekto, ginsuguran ini sadtong Enero 24, 2019 kag natalana kuntani nga matapos sang Pebrero 22, 2019 apang tubtob subong wala ini matapos.
Gilayon naman nga naghatag sang paathag si Engr. Edgar Agana sang Provincial Engineer’s Office angut sa amo nga proyekto.
Aminado si Agana nga temporaryo nila ini nga ginpauntat bangud sang nag-abot ang mga materyales nga gamiton sa amo nga proyekto, natukiban nga wala ini nagasantu sa ila nga program of works.
Bangud diri, ginpabalik ini sa supplier kag liwat nga suno kay Agana malawig pa ang proseso agud ma-procure liwat kag makuha ang nagakaigo nga materyales para sa amo nga proyekto.
Samtang, ginpasalig ni Agana nga sa Hunyo 20, sini nga tuig, matapos na ang nasambit nga proyekto bangud ila man nga nahangpan nga kinahanglanon ang nasambit nga tulay sang mga pumuluyo sa amo nga lugar.
