Magasugod na sa Marso 17 tubtob Marso 23 ang Western Visayas Regional Athletic Association (WVRAA) Meet 2026.
Sa interview sang Bombo Radyo kay Hernani Escullar Jr., Regional Information Officer sang Department of Education (DepEd) Region 6, iya ginpahayag nga may yara sang walo tanan ka mga competing delegations ang magapasakop lakip na ang Guimaras, Capiz, Aklan, Antique, Roxas City, Iloilo City, Passi City, kag Iloilo Province.
Suno kay Escullar, indi na by province ang competition, kundi by Schools Division Offices na ang scoring, buot silingon, mangin separado ang scoring sang Iloilo City kag Passi City sa Iloilo Province, kag Roxas City kag Capiz nga nagahatag sang mas patas nga sistema sa tanan nga participants.
Pahayag pa niya, ginkakas naman ang Integrated Meet kasunod sang pag-separar sang Negros Occidental gikan sa regional meet.
Dugang pa sang natungdan, target WVRAA Meet 2026 nga mahatagan sang oportunidad ang tanan nga delegations sa Western Visayas nga ipakita ang ila abilidad sa sports kag teamwork sa organisado kag matawhay nga kompetisyon.
INTERVIEWED BY: BOMBO ROADNIE DALANON
