Gin-evacuate ang pila ka mga residente sang Sitio Malabago, Barangay Cabugao, Ivisan Capiz bangud sa nagluntad nga landslide sa nasambit nga lugar.
Sa interview sang Bombo Radyo kay Punong Barangay Jane Marie Obuyes sang Barangay Cabugao, ginpahayag sini nga bangud sa nagluntad nga pagtiphag sang duta sa ila barangay, tatlo ka mga sitio sini ang apektado kag nabalhag sang mga ini nga nagdangat sa pito (7) tanan ka mga ka-sitiohan sini ang nakabalhag sang landslide.
Gindala ang masobra 20 ka mga evacuees nga nagikan sang mga apektado nga lugar sa ila barangay ang ginpadangat sa Barangay Hall nga nagserbe bilang evacuations center sang mga ini.
Madamo naman sa mga mangunguma kag tripulante ang naapektuhan tungod sa pagbaha kag paghapay sang pila ka mga pananom.
Naga pasalig naman si Punong Brgy. Obuyes nga gilayon ini nga aksyonan kag pagahatagan sini sang seedlings ang mga naapektuhan nga residente nagikan sa Department of Agriculture. Dugang pa sini, posible nga i-kanselar ang klase bwas nga adlaw sang Lunes sa nasambit nga barangay.
Sa karon, indi gihapon maagyan ang amo nga dalanon bangud ginsakop sang landslide ang duha ka porsyon sini.
