(UPDATE) – Natigayon nga ma-trace sang tag-iya ang iya cellphone isa ka oras matapos nga ginkuha sa iya sang wala makilala nga holdaper sa Sitio Sto. Niño, Arnaldo, Blvd., Brgy. Baybay, sini nga syudad.
Sa interview sang Bombo Radyo kay Bruce Bulacan, registered nurse kag residente sang nasambit nga lugar, nga nagguwa ang 968 Railway Street, sang gin-track sini ang iya cellphone.
Gilayon sini nga ginpalab-ot sa mga katapo sang kapulisan sa syudad sang Roxas, kag madasig nga ginpadulongan ang amu nga lugar, apang napaslawan ang mga otoridad nga makita ini tubtob sa karon nga inoras.
Matandaan nga mga alas-8 sa gab-i, Hunyo 14, samtang nagalakat si Bulacan kaupod ang iya abyan nga si Arnold Lopez, sang naglabay ang holdaper kag namangkot sa ila kun sa diin malapos ang ginakay-o nga dalan, nagsabat man ang mga ini sang insakto, apang nagpalangurog nalang sila matapos nga nagbalik ang lalaki kag nagdeklarar na nga hold-up, kag nagpanutok sang ginaalegar .45 calibre nga armas-luthang.
Bangud sa kahadlok, ginhatag ni Bulacan ang iya cellphone nga nagabalor sa P16,000, samtang P2,000 nga kuwarta ang nataban sa iya abyan.
Ginlaragway sang biktima ang holdaper nga may kaniwangon ang lawas, may kaatason, naka-kalo kag jacket, kag ang nanotisyahan sini nga may tono ang pag-tagalog sang namangkot sa ila.
Nahibaluan nga antes ang pagpanghold-up sa duha, may ginhold-up man kapin 1 ka oras ang nakaligad, mga ginabulubanta masobra isa ka kilometro ang kalayuon sa ila nahamtangan, kun sa diin nakuha sang holdaper ang cellphone kag bag nga may unod nga wallet kag school ID sang biktima.
Ginapahayag nga isa lang ka persona ang responsable sa duha ka insidente sang pagpanghold-up sa nasambit nga lugar.
