ROXAS CITY – Preparado na ang Don Conrado Barrios Memorial School sa Bgry. Baybay, Roxas City sa nagahilapit nga eleksiyon sa Mayo 9, 2022.
Sa pagpakig-angot sang Bombo Radyo sa pila ka manunudlo sa nasambit nga buluthuan, ginapahayag nga yara sa 27 ka mga manunudlo ang maga-duty sa adlaw sang eleksyon.
Magasugod ang pagbinotohay alas 6 sang aga tubtob alas 7 sang gab-i.
Walo ka classrooms ang ginhimo nga polling precinct sa nasambit nga buluthuan kag sa kada isa ka classroom, lima ka election board ang igapahamtang kag apat ka cluster polling precinct ang i-accommodate sang mga manunudlo nga ginabulunbanta yara sa kapin 1,000 ka mga botante.
Nagpaidalom naman sa seminar ang mga manunudlo nga ginpatigayon sang Comelec kun sa diin gintun-an sila kun paano mag-troubleshoot kun sa tion nga magkabereya ang smartmatic machine.
Base sa datos nga ila ginahawiran, yara sa kabug-usan nga kapin 8,000 ka mga botante ang ila i-accommodate sa nasambit nga memorial school.
Hugot man nga igapatuman diri ang mga health protocols kag may yara naman sang ginpahamtang nga isolation facility.
