ROXAS CITY – Amat-amat na nga nag-alabutan ang dugang nga mga Overseas Filipino Workers (OFW) repatriates sa probinsiya sang Capiz.
Ini ang ginpahayag ni Capiz Provincial Disaster Risk Reduction and Management Office (PDRRMO) Head Judy Grace Pelaez sang mainterview sang Bombo Radyo.
Suno kay Pelaez nga una nga nakaabot sa Capiz Villareal Stadium ang 19 ka mga OFW repatriates nga sakay sang una nga flight nga nag-abot sa siyudad sang Iloilo nga nag-avail sang repatriation program sang gobyerno-nasyunal.
Magluwas diri suno sa iya, mag duha pa ka mga batches nga magaabot sa Capiz nga sakay sang duha man ka separado nga flights nga magaabot sa Iloilo.
May yara man sang kapin sa 66 ka mga OFW’s nga magapauli sa Capiz nga sakay naman sang barko sa idalom sang Malasakit Voyage sang gobyerno-probinsiyal sang Capiz.
Ginpahayag ni Pelaez nga kapareho sa iban nga mga repatriates nga una na nakapauli sa probinsiya, pagakuhaan man ang mga ini sang swab specimen agud ipaidalom sa real-time polymerase chain reaction (RT-PCR) test.
Magapadayon man suno diri ang ila nga 14-day quarantine period sa tagsa ka mga local government units (LGU’s) quarantine facility.
Suno pa kay Pelaez nga bastante pa man ang RT-PCR testing kits bangud magluwas sa ginbakal sang gobyerno-probinsiyal, may yara man sang ginahatag ang Department of Health (DOH) magluwas pa sa mga rapid testing kits nga ginagamit man sa mga nagaalabutan sa probinsiya.
