Isa sa mga topiko nga gintalakay sa trilateral phone call meeting nanday Pang. Ferdinand Marcos Jr., Japanese Prime Minister Ishiba Shigeru kag outgoing US Pres. Joe Biden amu ang iligal kag mga delikado nga aksyon sang China sa bahin sang West Philippine Sea.
Ini ang base sa statement nga ginpaguwa sang White House matapos makighinun-anon ang tatlo ka lider sa sulod sang 25 minutos kahapon nga adlaw.
Mahibaluan nga sa karon mas labi nga nangin agresibo ang China partikular sa pag-atubang sini sa mga barko sang Pilipinas.
Sa pinakaulihi nga aktibidad, sang nasiplatan ang monster ship sang China Coast Guard sa kadagatan malapit sa Zambales nga yara sa sulod sang exclusive economic zone sang Pilipinas.
Suno sa White House, ginhinalaan sang tatlo ka lider kun paano pabaskugon pa ang trilateral maritime security and economic cooperation.
Nagkasugot man sanday Pang. Marcos, Ishiba kag Biden nga pabakuron pa ang kaangtanan agud masiguro ang hilway kag bukas nga Indo-Pacific region.
Sa nasambit nga phone call meeting, gindayaw ni Biden si Pang. Marcos sa iya sini malig-on nga panindugan batuk sa mga delikado nga aksyon sang China sa bahin sang West Philippine Sea.
Padayon naman nga nagapanindugan si Pang. Marcos nga indi sini pag-isungka ang teritoryo sang Pilipinas, bisan pa isa ka pulgada.
Sa pihak nga bahin, isa ka semana na lamang magapabilin sa pwesto si Biden bangud nakatalana na nga mag assume bilang bag-o nga Pangulo sang Amerika si President-elect Donald Trump sa Enero 20,2025.
