ROXAS CITY-Patay ang 16-anyos nga solterito matapos nga ginaalegar ginluthang sang kaugalingon nga tiyo sa Barangay Carataya, Cuartero, Capiz.
Ginkilala ang biktima nga si Dinnes Felipe sang nasambit nga lugar.
Sa interview sang Bombo Radyo kay Deputy Chief of Police sang Cuartero Municipal Police Station nga si Police Executive Master Sergeant Arnold Batacandolo nga nagpadulong sa balay sang biktima ang suspek nga tiyo man sini nga si Rommel Felipe 40-anyos sang nasambit nga lugar kag ginpangita ang iya nga magulang.
Bangud sa kaakig sang suspek ginaalegar nga ginluthang-patay sini ang iya gumangkon nga naigo sa agtang kag paa.
Gindala pa sa Dao District Hospital ang biktima apang gindeklarar man ini nga dead on arrival.
Nagaguha sa imbestigasyon sang mga kapulisan nga ang kontra sang suspek amo ang magulang sang biktima.
Mahibaluan nga antes natabo ang insidente, nag-angkon sang komosyon sa tunga sang suspek kag magulang sang biktima.
Narekober naman sa crime scene ang apat ka mga basiyo sang kalibre 45 nga armas-luthang nga ginamit sang amo nga suspek.
Nagapadayon naman ang ginakasa nga hot-pursuit operation sang mga kapulisan matapos nga madasig nagpalagyo ang suspek matapos ang nagluntad nga krimen.
