SIGMA CAPIZ – Aprubado na ang P3-M budget nga ginpain para sa road maintenance sa mga kabarangayan sa banwa sang Sigma.
Ini matapos nga ginpatawag ang 21 ka mga Punong Barangay kag naistoryahan ang nasambit nga pondo sa ginpatawag nga committee hearing sang Committee on Finance and Appropriation.
Sa interview sang Bombo Radyo kay Hon. Esperidion “Speed” Pelaez, Sangguniang Bayan member sang Local Government Unit (LGU) sang Sigma nga napagdesisyunan sang SB members nga indi nalang pag i-override ang budget nga una na gin-veto ni Sigma Mayor Christopher Andaya.
Matandaan nga nauna na nga nadismaya si Mayor Andaya matapos gin-ibanan sang Sangguniang Bayan sang P1.5-M nagikan sa P3-M nga budget para sa road maintenance sa mga kabarangayan sang nasambit nga banwa.
Matapos ang pagpaguwa sang sentimyento sang mga kapitanes, nadesisyunan sang komitiba nga ihatag sa mga pumuluyo ang ila kinahanglanon – amo ang pagpakay-o sang ila mga dalanon.
Tinutuyo sang SB members ang makapamaayo sa mga pumuluyo sa banwa sang Sigma.
