ROXAS CITY – Nagpatigayon sang 𝟯𝟳th National Disaster Resilience Month nga may tema nga “Kumilos para sa Kahandaan, Kaligtasan at Katatagan” ang probinsya sang Capiz sang Hulyo 1, 2025.
Sa interview sang Bombo Radyo kay Atty. Shiela Artillero, Head sang Provincial Disaster Risk Reduction and Management Office (PDRRMO), iya ginpahayag nga ang amo nga mga tikang ang ginapatigayon sang ila nga tanggapan agud mapabaskog ang resiliency sang probinsya.
Dugang pa sini, ang nagapanguna nga katuyuan sang pagselebrar sang National Disaster Resilience Month ang indi lang sang pagpasangkad sang ihibalo kundi ang pagpalapnag sang tama nga impormasyon kag mga tikang sa disaster preparedness. Ginsambit man sini nga ang ila nga mga community drills kag outreach programs nga tiutuyo nga mapalapad ang ihibalo sang tagsa-tagsa sa mga lokal nga komunidad.
Isa sa nagapanguna nga inisyatibo sang Provincial Disaster Risk Reduction and Management Office (PDRRMO) amo ang pagpasangkad sang disaster response system sa probinsya sa diin nga nag-designar ang talatapan sang mga evacuation centers kag mga kagamitan agud masiguro ang kaluwasan sang mga pumuluyo sa oras sang kalamidad.
Ginhatagan man pagtamod ni Atty. Artillero ang importansya sang pagbinuligay sang nagkalain-lain nga sektor, kalakip na ang gobyerno, pribado nga sektor, kag mga non-government organizations, agud mas mapasangkad ang disaster resilience bangud suno sa iya, indi bastante ang pondo lang rason nga kinahanglan ang kooperasyon sang tanan agud malab-ot ang isa ka mabaskog kag preparado nga komunidad.
Samtang, ginpahanunduman ni Atty. Artillero ang kinahanglanon sang padayon nga edukasyon kag kasanayan para sa disaster preparedness kag suno pa sa iya, ang pag-angkon sang isa ka mapag-on nga komunidad, nakasalalay sa tagsa-tagsa, kag ang National Disaster Resilience Month isa ka pahanumdom nga ang preparasyon kag mangin mabaskog ang naga-umpisa sa mga tikang nga ginahimo sang tagsa-tagsa sa kada adlaw.
