Pila ka mga miyembro sang Provincial board, pending ang ginrequest nga budget sa opisina sang Gobernador

ROXAS CITY – Ginahulat nalang sang pila ka mga board member kalakip ang bise-gobernador ang pirma sang Gobernador agud ma-release ang ila ginrequest nga budget sang ila talatapan.

Sa interview sang Bombo Radyo kay Vice Governor Jaime “Mitang” Magbanua, suno diri nga kutob sa karun, pending sa gihapon ang ila mga tseka bangud wala pa napirmahan ni Governor Esteban Evan “Nonoy” Contreras.

Apang, may ara na sang ila nga mga kaupdanan nga ginrelease ang kapareho man nga pagrequest sang budget sa ila mga opisina.

Suno pa diri nga indi ini makahambal kun may pinilian ang Gobernador apang natingala lang ini nga apisar kumpleto ang ila dokumento kag may ara sang tseke, wala pa ini ginapirmahan sang nasambit nga gobernador.

Nahibaluan nga ang nasambit nga request amu ang budget sa 4^th quarter sang tuig 2020 nga igadugang sa budget sang  1^st quarter sang tuig 2021.