ROXAS CITY, CAPIZ- ‘Mabuot’, ‘maayo nga tawo’, kag ‘wala ka gid sang may makuha sa iya’, pila sa mga tinaga nga ginsiling sang tiglikom sang barangay base sa pagkilala sini sa nagtaliwan nga Kapitan sang Barangay VI, Roxas City, Capiz.
Ang nasambit nga nagtaliwan nga Kapitan amu si Hon. Joseph A. Tinoy.
Sa interview sang Bombo Radyo kay Mrs. Nenita V. Balbino, Barangay Secretary sang nasambit nga barangay, ginpahayag nga sa ila nga bahin sang barangay council, nagakasubo man sa pagtaliwan ni Kapitan Tinoy.
Dugang pa sini, ang amo nga kapitan ang isa ka mabuot, maayo nga tawo, kag tampad sa pagserbisyo. Sa pihak nga may pila ka mga indibidwal nga nagadaog-daog sa iya, suno kay balbino, wala ini gabato kag kaangay ginapabay-an nalang bangud nga sa indi ini maluyagon sang gamo.
Si Kapitan Joseph Tinoy ang suno sa iya nagasupreher na sang sakit, kaangay nga mataas ang uric acid sini kun sa diin nga nagabatyag ini sang pagpalanakit sang iya nga paa.
Sa madumduman, nagselebrar pa sang kaadlawan si Kapitan Tinoy sang Mayo 11, kag sang Mayo 12, naka-assist pa ini sa mga pumuluyo sa pagboto kag pagkatapos sang amu nga eleksyon, na-admit ini sa isa ka ospital sa syudad sang Roxas sang yara sa 14 tubtob 15 diyas kun sa diin nga gin-emergency dialysis ini.
Nahibaluan nga nakapauli pa ini sa ila nga balay, matapos nga gin-emergency dialysis, apang nagbalik naman ini sa ospital sang gin-atake naman ini sang iya nga lagnat kun sa diin nga ginabawal sang doktor nga latnan sang sini nga balatian. Apang, sa masubo nga balita, takna las 5:00 sang aga sang Hunyo 9, 2025, ginbawian sang kabuhi si Kapitan Joseph Tinoy sa edad nga 58.
Samtang, suno kay Balbino, posible bwas nga adlaw, Hunyo 10, 2025, magapatigayon sang paghinun-anon ang barangay council may kaangatan sa pagkamatay ni Kapitan kag sang dugang pa nga mga tikang may kaangtanan sa pagdumala sang ila sini nga barangay.
Interviewed by Bombo Francis Binas
