CAPIZ- Nagapadayon subong ang maid-id nga imbestigasyon sa mga river control project sa panay river nga may tinutuyo nga protektahan ang kabuhi, pangabuhian, kag komunidad batok sa padayon nga pagbinaha.
Apisar nga may maayo nga katuyuan, ang proyekto padayon nga nagaatubang sang madamo nga mga residente sang probinsya sang Capiz.
Sa interview sang Bombo Radyo Roxas kay Engr. Cecil Lawrence Cruz- 1st district engineer sang Province of Capiz, iya ginpahayag nga isa sa mga nagapanguna nga katuyuan sang proyekto amo ang paghatag sang proteksyon sa mga pumuluyo nga nagapuyo sa palibot sang suba, labi na gid kon may mabunok nga ulan.
Suno sa iya, may yara man sang insakto nga koordinasyon sa tunga sang mga lokal nga gobyerno, barangay, kag iban pa nga ahensya agud nga mapatuman ini nga proyekto.
Apang gin-ako sang mga otoridad nga kulang gid ang pondo para sa kinahanglanon nga mga estruktura kag maintenance.
Bangud sini, bisan may mga ginahimo na nga tikang, nagapadayon gihapon ang pagbaha sa pila ka parte sang Probinsya, labi na kon tig-ululan.
Dugang pa sang natungdan, may limitado lang nga kabuhi ang mga materyales nga ginagamit sa proyekto. Ginatagna nga magaabot lang ini tubtob napulo (10) ka tuig antes ini maguba ukon indi na magamit, rason nga kinahanglan ini nga regular nga ma-rehabilitate.
Tungod sini, nagapanawagan ang mga residente kag lokal nga opisyal sang Capiz sang dugang nga suporta halin sa National Government para mahatagan sang mas madugay kag mas epektibo nga solusyon ang problema sang pagbaha sa bug-os nga probinsya.
Interviewed by: Bombo Francis Biñas
