ROXAS CITY – Ginpabalhag sang mismo driver sang aluminum van nga nakabunggo sa isa ka tiyangge sa kilid sang dalan sa Sitio Sumiga, Barangay Milibili, sini nga syudad.
Ginkilala ang driver sang Isuzu NKR truck aluminum van kay Erick Justin Monta, 34-anyos, residente sang Jalaud Norte, Zarraga, Iloilo.
Sandig sa iya ginreport sa mga kapulisan nga samtang ginasubay sini ang dalan padulong sa direksyon sang Iloilo City mga alas-7:24 kagab-i sang Martes, wala sini matalupangdan ang sanga sang mangga sa kilid sang karsada, rason nga naigu ang ibabaw nga porsyon sang iya ginamaneho nga van, nga gintunaan sang pagkadula sang kontrol sa manubela kag bumunggo sa tiyangge nga ginapanag-iyahan ni Ferdinand Dayao, 43-anyos, isa ka seafarer kag residente sang amu nga lugar.
Bangud diri, nag-angkon sang menor nga nga kahalitan ang nasambit nga balaligyaan.
Natigayon man nga ma-release ang nakabunggo nga salakyan matapos ginkustodiya sa Roxas City PNP.
